HAZY LIFE

အသက်က တစ်နှစ်ကြီးလာပြန်ပြီ... လွန်ခဲ့တဲ့ ၂၆ နှစ်ရဲ့ ဒီနေ့လေးက ပါပါး မာမား အသဲတုန် အူတုန်ဖြစ်မဲ့ နေ့လေးဆိုရင် မမှားလောက်ပါဘူး... အခုထိလည်း တုန်နေတုန်းပါပဲ... အဝေးကနေ ဟိုသွားဒီသွား တစ်ခုခုဖြစ်မှာစိတ်ပူ ဟိုစားဒီစား အစားမှားမှာစိတ်ပူ... နောက်ဆုံး Facebook သုံးတာ ကအစ စိတ်ပူပေးနေတဲ့ မာမား... ၂၆ နှစ်ပြည့်လည်း ဒီသားက ကလေးပါပဲ... ဘယ်အချိန်မဆို မာမားရှေ့မှာ သားဟာ ကလေးတစ်ယောက်ပါ... အထူးသဖြင့် ဖြူစင်တဲ့ ကလေးတစ်ယောက်ဖြစ်အောင် ကြိုးစား နေပါတယ်... ကလေးကလေး နဲ့ရေးနေလို့ လူအမြင်ကတ်မှာစိုးလို့ ပြောင်းလိုက်ပါဦးမယ်...

ကံတရားက ဖေးမပေးလို့ လက်ရှိလူဖြစ်နေတဲ့ဘ၀လေးမှာ ပုံမှန်လူတန်းစားထက် မနှိမ်တဲ့ အခြေအနေလေးတစ်ခုကို ဘ၀တစ်လျှောက်ရရှိခဲ့တယ်... ဒီ <အဖေ> ဒီ အမေ ဒီ မိသားစု နဲ့ ကျွန်တော့်အပေါ် အမေအဖေအရင်းနဲ့တမျှ ချစ်ကြတဲ့ ဦးလေး အဒေါ် တွေနဲ့ ဆုံတွေ့ရတဲ့ ဒီဘ၀ တခြားဘာနဲ့မှ မလဲနိုင်ပါဘူး... အဲဒါ သစ္စာပါ...

လူ့လောကမှာ ၂၆ နှစ်လုံးလုံး ချစ်တဲ့ခင်တဲ့သူတွေရဲ့ ချစ်တာတွေ... စိတ်ပူတာတွေ... စိုးရိမ်တာတွေ... ပြုစုစောင့်ရှောက်တာတွေ... သနားယုယတာတွေ... စတဲ့ ကောင်းမွန် ပြည့်စုံခြင်းတွေနဲ့ အတူ... မနာလို မုန်းတီးသူတွေရဲ့ ခိုးကြောင်ခိုးဝှက် တိုက်ခိုက်တာတွေ.. မျက်နှာဗြောင်တိုက် လုပ်ကြံတာတွေ... မုန်းတီးတာတွေ... မကြိုက်မနှစ်သက်တာတွေ... မဟုတ်တာကို အဟုတ်လုပ် ပြောဆိုဖန်တီးတာတွေ... စတဲ့ မကောင်းမှုတရားတွေလည်း ကြုံဖူးပါပြီ... အဲ့လို ကောင်းခြင်း မကောင်းခြင်းတွေရဲ့ ဒဏ်ကိုခံခဲ့ရတဲ့ ၂၆ နှစ်တာ ခန္ဓာကိုယ်လည်း ဘယ်လောက်တောင်ယိုင်နှဲ့နေပြီလဲဆိုတာ ကိုယ့်ကိုကိုယ်တောင် မသိတဲ့အထိ အသိတရားကလည်း ကင်းမဲ့နေတုန်းပါ...

ငယ်ငယ်တုန်းက ဗုဒ္ဓဘာသာကို သာမာန်ကိုးကွယ်မှုမျိုးနဲ့ ကိုးကွယ်ခဲ့ဖူးတယ်... အနှစ်သာရမရှိတဲ့ အယူတွေလည်း နှစ်ခြိုက်ခဲ့ဖူးတယ်... မိစ္ဆာဒိဋ္ဌိတရားတွေလည်း အဟုတ်ကြီးမှတ်ပြီး အထင်ကြီးဖူးတယ်... တဖြည်းဖြည်းနဲ့ အသိတရားရလာတော့ အနှစ်သာရမရှိတာတွေ သွေဖယ်ပြီး နှိုင်းတုမရတဲ့ ထေရ၀ါဒ ဗုဒ္ဓဘာသာကို နည်းနည်းခြင်း လေ့လာ သင်ယူခွင့်တွေရရှိခဲ့တယ်... အခုချိန်မှာတော့ မိရိုးဖလာ ဗုဒ္ဓဘာသာဝင်တစ်ယောက်နေ သွေဖယ်နေပြီ ဆိုတာတော့ ကိုယ်တိုင်ယုံကြည်မှု အပြည့် ရှိလာတဲ့အထိဖြစ်လာပြီ... အိမ်မှာရှိခဲ့တဲ့ နတ်တွေ (မြန်မာ...တရုတ်... ကုလား...) ဘယ်နတ်မှမကျန်အောင် ရှင်းလင်းသုတ်သင်နိုင်ခဲ့ပြီး... ကြောက်လို့ ကိုးကွယ်ရတဲ့ မိစ္ဆာဒိဋ္ဌိဝါဒကို စွန့်လွှတ်နိုင်ခဲ့တယ်... သားရယ် မာမားရယ် ၂ ယောက်ပေါ့... ဗုဒ္ဓဘာသာဆိုတာ လွတ်လပ်တယ်... ပွင့်လင်းတယ်... မေးခွန်းတွေနဲ့ မှတ်ကျောက်တင်ခံနိုင်တယ်... နိဗ္ဗာန်ဆိုတဲ့ ပန်းတိုင်ရှိတယ်... အဲ့ဒီလို တန်ဖိုးရှိတဲ့ ဘာသာတရားတစ်ခုရဲ့အောက်မှာ နေရတဲ့ လူ့ဘ၀တိုလွန်းတော့လည်း စိတ်ညစ်မိတယ်...

ငယ်ငယ်ကတည်းကနေ တက္ကသိုလ်အောင်ပြီးလို့ လုပ်ငန်းခွင်ဝင်တဲ့အထိ (မောင်တောမြို့ မရောက်ခင် အထိ)... အိမ်ဆိုတဲ့ အေးမျှတဲ့ အရိပ်ကလေးမှာ အပူအပင်မရှိ လိုချင်တာ ပူစာ... စားချင်တာဝယ် စား... လုပ်ချင်တာ ဇွတ်လုပ်... အေးမျှခြင်းရဲ့ တန်ဖိုး ကောင်းကောင်းနားမလည်ခဲ့ဘူး... ၂၀၀၉ ကစပြီး
မောင်တော (ရခိုင်ပြည်နယ်) ဘက်ကို အလုပ်လုပ်ဖို့ အိမ်ကနေခွါပြီး အလုပ်လုပ်ရမယ်ဆိုတော သိလိုက်ရမှ အိမ်ရဲ့တန်ဖိုးကို သိလိုက်ရတယ်... ဒါတောင် အတိအကျမဟုတ်သေးပါဘူး...
ဝေးလေ သိလေ ဆိုတဲ့ စကားက အရမ်းမှန်တာ... သူများတွေက ဘယ်သူနဲ့ဝေးဘယ်ဝါနဲ့ဝေး ဆိုပြီး အဓိပ္ပါယ်ပြန်ကောင်းပြန်မယ်... ကျွန်တော်ကတော့ အိမ်နဲ့ဝေးလေ အိမ်ရဲ့ အေးချမ်းမှု တန်ဖိုးသိလေပဲ... အခုဆိုရင်တော့ ၁၀၀% သေသေချာချာသိသွားခဲ့တဲ့အချိန်ပေါ့... 

ဂျီတော့ပ်မှာ အခုတင်ထားဖြစ်တဲ့ စာသားလေးလိုပါပဲ... အဲ့ဒီစာသာလေးက ကျွန်တော့် ၂၆နှစ်ပြည့် မွေးနေ့လေးမှာ ရင်ကိုအထိုးနှက်ဆုံးနဲ့ အမှန်တရားအပေးဆုံးစာသားလေးပါပဲ... အဲဒါလေးကတော့...


THERE IS NO PLACE LIKE HOME


အားလုံးကိုကျေးဇူးတင်ပါတယ်...
ဇင်မျိုး...

Leave a Reply